„Íslendingar eru almennt jákvæðir fyrir þátttöku í vísindarannsóknum en líklega hefur þjóðin aldrei verið jafn meðvituð um mikilvægi vísinda og akkúrat núna. Heimsfaraldur COVID-19 er samfélagslegt áfall á heimsvísu en við Íslendingar höfum hér einstakt tækifæri til að skilja betur hvaða þættir hjálpa og hvaða þættir eru íþyngjandi í þessum óvenjulegu aðstæðum,“

UNNUR ANNA VALDIMARSDÓTTIR, PRÓFESSOR VIÐ LÆKNADEILD HÁSKÓLA ÍSLANDS

„Við höfum áhyggjur af víðtækum áhrifum þessa faraldurs, eins og áhrif á geðheilbrigði. Því finnst okkur mikil ástæða til að skoða hlutina með vandaðri rannsókn og við viljum hvetja alla til að taka þátt því að þannig getum við tekið betur stöðuna og jafnvel komið út úr faraldrinum sem betra samfélag."

ALMA D. MÖLLER, LANDLÆKNIR

„Ótti er skilgreindur sem ógn sem þú þarft að bregðast við og hún fylgir öllum krísum. Það skiptir mjög miklu máli að reyna að rannsaka það þegar svona stórar krísur eru í gangi, hvernig fólki líður, hvernig það brást við og hvernig hlutirnir líta út fyrir þeim, þannig að næst þegar við komum í stór verkefni þá getum við gert betur."

VÍÐIR REYNISSON, YFIRLÖGREGLUÞJÓNN

„Þessi faraldur er fordæmalaus að því leitinu til hvað hann er útbreiddur og hvaða afleiðingar hann hefur. Viðbrögðin við þessum faraldri eru slík að allt samfélagið fer meira og minna á hliðina og afleiðingarnar af því eru mjög margar; andlegar afleiðingar, sálarlegar afleiðingar, afleiðingar sem tengjast tilfinningalífinu og samskiptum og öðru slíku. Það er því mjög mikilvægt að kanna ekki bara faraldurinn sjálfan sem smitsjúkdóm heldur líka allar afleiðingar af honum. Við þurfum að hafa rannsóknir til að styðjast við hvað virkar og hvað ekki, þannig að vísindaleg nálgun er algjörlega lykillinn að því að ná viðunandi árangri á svona tímum."

ÞÓRÓLFUR GUÐNASON, SÓTTVARNARLÆKNIR